Pemedis ati meda SNAP enda berabis ati ngering ka Iban/Dayak enda olih kira.
Pemedis ati meda SNAP nadai penyinu ka bangsa diri ke semampai dikemeli ka TAIB enggau Melayu kelebih agi bala UMNO enggau bala Malaya ka bukai, asai ka deka nurun ngayau, awak ka pengering tulang nentu ka sapa patut bekuasa. Udah ga bala Melayu sigi kering, kaya agi nya, udah nya semoa Melayu kelebih agi UMNO/MALAYA betulung magang ngenyak ka kitai DAYAK.
Enti bejako ba sebelah News paper, radio & TV, sida tu munyi ka manah, tang kebendar sida ngemeli ka IBAN/DAYAK. Bala tuai Iban/Dayak ka dalam perintah BN, tak semampai rauh rauh ngumbai PERINTAH Melayu/Perintah TAIB/Perintah UMNO/Malaya manah enggau bangsa Iban/Dayak.
Iga Petara enda meda anak Mensia ka bangsa IBAN/Dayak cukup merinsa dikemeli ka orang belama lama.
Menoa enggau Tanah abis teberunsai ko jako dimansang ngambi ka bisi endor Iban/Dayak ngiga penyenang. Anang ka ngasoh senang, ngasoh merinsa ka mayuh agi.
Tanah temuda enggau pemakai menoa, diatu ko jako disukat magang, tang kebendar sukat nya ukai sukat enggau ati ka lurus, laban orang ka meri belanja ngasoh nyukat tanah Iban/Dayak terubah ia ianya orang Malaya, kini ka perut buntas Taib enggau perintah BN Sarawak nadai untak deka nyukat tanah Iban/Dayak apin perintah Malaya meri belanja ngasoh nyukat tanah Iban/Dayak?? Nama, enti perintah Malaya apin nunjuk ka jalai baka ni ngenyelap ka ati Dayak, Taib enggau BN Sarawak enda nemu pia?
Ingat kitai bangsa Iban/Dayak, Taib enggau perintah ia ukai enggau ati ka amat manah deka nulung Iban/Dayak, tang mayuh agi sida tu pura pura kena ngemanjai ka agenda politic sida ia aja. Nya alai, anang sekali kali kitai nyukung sida tu agi, kitai mesti madam ka perintah sida tu laban sida nadai tuju bukai, tang semina ngemeli ka bangsa kitai baka ngaga anak mit, enti nyida diberi upah gula batu ngambi enda ringat.
Snap nadai penyinu ka bangsa kitai ka semampai diCIPING Laut belama lama dalam pengawa kerja dalam opis perintah, baka nya mega kitai semampai di CIPING lalu cukup enda adil enggau bangsa kitai dalam pengawa ba company company minyak enggau Gas dimenoa kitai Sarawak tu. Kitai ka ngempu pengeraja, kitai ka nyembah sida Malaya, dini patut baka tu. Nya alai, anang sekali kali kitai ngundi perintah BN menoa Sarawak tu, laban sida semina ngisi perut diri empu aja, kitai Iban/Dayak digaga sida baka “pengemis” MINTA LALU NYEMBAH SIDA AJA.
Snap nadai penyinu meda bangsa kitai Iban/Dayak ka ngampar sebelah menoa Malaya din ngiga pengidup, kini ka peluang kerja dimenoa Sarawak tu? kebendar semoa peluang kerja ka menyana, begaji besai, dimenoa Sarawak tu udah di KUNCI Laut enggau UMNO/Malaya semina di ungkup ka Melayu aja. Bangsa kitai dilak, diansak kerja sebelah Malaya din, ngambi sida nyadi orang Malaya badu ingat ka menoa diri empu agi, menoa kitai di Sarawak ditu, ela, serah aja ngagai Malaya, laban kitai ko sida enggai diau di Sarawak agi, Tu plan ka panjai dalam agenda Melayu Raya ka belalai dalam 1 Malaysia.
Snap nyau buta diatu, enda meda MARUAH bangsa Iban/Dayak udah TERGADAI. Enggi bangsa Melayu, bangsa Cina, udah bisi tugu pengingat enggau museum ka bansa sida, enggi kitai Iban/Dayak kemaya meh digaga?? Sigi kebendar perintah Taib enggau BN Sarawak deka ngelemi ka Iban/Dayak ari serak siti ngagai serak siti, nyentuk ka Iban/Dayak enda olih ngelaban, enda olih bejako agi, tang semina minta enggau nyembah sida aja. Peda diatu, berapa puluh ribu bangsa Iban/Dayak, tiap taun masuk pengarap sida lalu nyadi bangsa sida.
Snap mega buta, enda meda pengarap bangsa kitai cukup dikemeli ka Melayu/UMNO/Malaya. Patut ka enda bup KUDUS kitai digaga baka Bup ngapa,lapa Bup Koran sida enda tau dicop baka sida ke ngaga Bup Kudus kitai? Bendar amat Melayu deka munas ka bangsa Iban/Dayak, bisi YB Iban bejako ngumbai kitai enda mereti, enda nemu. Tang ke bendar YB kitai Iban ka dalam perintah Melayu/BN diatu semoa udah di tapak KAKI Melayu enggau Malaya magang. Bejako semina kena sida nunjuk ka diri nyukung BOSS sida CM enggau PM aja, ukai enggau pengabis ati ngering ka pengarap enggau bangsa kitai tang sida bejako ngambi ka kena sida ngelaku lalu ngemesai ka diri empu aja. BADU agi kitai nyukung bala YB Iban ke dalam perintah Taib ka diatu.
Snap enda meda penusah anak bangsa kitai deka nyambung pelajar, minta scholarship tau ka nyambung pelajar ka menoa tasik. Uji peda, ari penyampau pemayuh tubuh anak Bangsa Dayak dalam menoa Sarawak tu, nama kebuah kitai enda olih diberi peluang sama mayuh baka enggai Melayu deh?
Mayuh utai bukai enda olih di ading, enda olih dirintai ka ditu magang, nya meh, enti kitai nemu diri diciping Melayu & Malaya belama, BADU AGI NGUNDI TAU KA NYUKUNG BN. Buai abis buai lengis ka semoa YB BN Iban/Dayak bepilih tu ela, sida ukai deka nyadi pengari bangsa kitai, tang meh sida semina ngira diri empu aja.
Laban SNAP nadai penyinu, nadai perambu deka nulung bangsa Iban/Dayak, ANANG SEKALI KALI NYUKUNG SNAP. Awak ka SNAP ati diri, laban ia semampai ngiga jalai baka ni ngasoh TAIB mai sida sebilik baru. Ukai deka ngemansang ka IBAN/Dayak, tang meh deka nulung orang selipi enggau bangsa Kitai.
